कैलाली भन्सार कार्यालय धनगढी उपमहानगरपालिका वडा नं. २, त्रिनगर कैलालीमा अवस्थित छ । नेपालका ३९ वटा मुल भन्सार कार्यालयहरु मध्ये भारत सँग सिमा जोडिएको कैलाली भन।सार कार्यालय पनि एक हो ।नेपाल र भारत व्यापार सन्धिले २७ ओटा नाकाहरुलाई द्विपक्षिय व्यापार नाकाको रुपमा स्वीकृत गरेको छ । जसमा यो नाका पनि पर्दछ । यो भन्सार कार्यालय २०१३ सालमा स्थापना भएको हो । यो भन्सार अन्तर्गत बेलौरी, परासन, भडरी , कजरी र घुइयाघाट गरी पाँच वटा छोटी भन्सार कार्यालयहरु छन् । उक्त छोटी भन्सार कार्यालयहरु हाल सञ्चालनमा छैनन् । निकट भविष्यमै वेलौरी छोटी भन्सार कार्यालय सञ्चालनमा ल्याउने तयारी भैरहेको छ । सिमास्थित भारत तर्फ गौरी फन्टा भन्सार कार्यालय रहेको छ ।

यो भन्सार कार्यालयले बार्षिक अरबौ रुपियाँ राजस्व संकलन गरी देशको आन्तरिक राजस्व परिचालनमा महत्वपूर्ण स्थान ओगटेको छ । यस कार्यालयले निकासी पैठारी हुने मालसामानमा जाँचपास गर्ने कार्य मात्र नगरी सिमा सुरक्षाको जिम्मेवारी, अन्तर्राष्ट्रिय व्यापार सहजीकरण एवम् राष्ट्रिय हित संरक्षण तथा अवैध व्यापारिक क्रियाकलाप नियन्त्रण गरी वैध व्यापार प्रवर्द्वन र सहजीकरणको भुमिका पुरा गर्दै आएको छ । जनसाधारणको स्वास्थ्य र वातावरणलाई असर पार्ने मालवस्तुको निकासी पैठारी नियन्त्रण गर्ने कार्य समेत यो भन्सार कार्यालयले गर्दै आएको छ ।